ᑐᓂᓯᓂᖅ

ᕖᕗᐊᕆ 12, 2025-ᒥ ᐅᓪᓛᒃᑯᑦ ᐊᖅᓯᒃᑯᑦ ᐃᓂᒋᓚᐅᖅᑕᖓ ᖏ/ᐃᑭᓚᐅᖅᐳᖅ ᐃᒡᓗᓕᒡᓗ ᑭᑉᓯᒐᒃ ᓯᐊᕐᕆᔮᕐᕕᖓ. ᐃᑯᐊᓚᓚᐅᖅᑐᖅ ᐅᓪᓘᑉ ᓄᕐᖑᐊᓄᑦ ᑎᑭᖢᒍ, ᐃᓂᒋᔭᖓᓄ ᐊᐅᒻᒪᖑᖅᖢᓂ ᐊᒻᒪᓗ ᓯᐅᕐᕆᔮᕐᕕᒃ ᓄᖑᑎᖅᑕᐅᓪᓗᓂ.

ᐊᖅᓯᖅ ᐃᓂᒋᓚᐅᖅᑕᖓ ᐱᓕᒻᒪᒃᓴᕐᕕᐅᓚᐅᖅᐳᖅ, ᖁᙱᐊᕐᕕᐅᓪᓗᓂᓗ ᐊᒻᒪᓗ ᐃᓕᖅᑯᓯᓕᕆᕝᕕᐅᓪᓗᓂ ᐃᒡᓗᓕᒃ ᓄᓇᕗᒻᒥ, ᐊᐅᓚᑕᐅᓪᓗᓂᓗ ᐊᖅᓯᒃᑯᓐᓄᑦ, ᐃᒡᓗᓕᖕᒥ ᐃᓄᐃᑦ ᖁᙱᐊᖅᑕᐅᕙᒃᖢᑎᒃ. ᐊᖅᓯᖅ ᐊᐅᓚᓯᒋᐊᓚᐅᖅᐳᖅ 1998 ᐊᐅᔭᖓᓂ ᐃᒡᓗᓕᖕᒥ.

ᓴᓇᔭᐅᓚᐅᖅᑐᖅ ᒪᒃᑯᒃᑐᓄᑦ ᐃᒡᓗᓕᖕᒥᐅᓂᑦ ᖃᓪᓗᓈᓂᕐᒥᐅᓄᓪᓗ, ᑕᐅᑐᙳᐊᖅᖢᑎᒃ ᓯᕗᓂᒃᓴᑦᑎᐊᕙᖕᒥᑦ ᐱᓕᕆᖃᑎᒌᒃᖢᑎᒃ ᒥᒃᖠᕚᓪᓕᖅᑎᑦᑎᓇᓱᒃᖢᑎᒃ ᒪᒃᑯᒃᑐᓂᑦ ᐃᒻᒥᓃᖅᐸᒃᑐᓂᑦ ᓄᓇᓕᖏᓐᓂᒃ, ᑕᐃᔅᓱᒪᓂᐅᑎᓪᓗᒍ, ᐅᓄᙱᑦᑐᑯᓗᖕᓂᒃ ᐱᕕᒃᓴᖃᖅᑎᑕᐅᕙᓚᐅᖅᒪᑎ ᒪᒃᑯᒃᑐᑦ ᐃᒻᒥᓂᒃ ᐅᖃᐅᓯᖃᕈᓐᓇᕐᓂᕐᒥᒃ ᓄᓇᓕᖕᓂ; ᐃᓂᒃᓴᖅᑕᖃᓚᐅᖏᑦᑐᖅ ᒪᒃᑯᒃᑐᓄᑦ ᑲᑎᙵᕕᒃᓴᒥᒃ, ᐱᙳᐊᕐᕕᑐᖃᐅᑉ ᐳᐃᔾᔪᕌᕐᕕᑐᖃᐅᓪᓗ ᐊᓯᐊᓂᒃ. ᑕᐃᒪᙵᓂ, ᐱᕚᓪᓕᖅᓯᒪᒻᒪᕆᒃᐳᒍᑦ. 2009-ᒥ, ᐊᖅᓯᒃᑯᑦ ᓴᓇᓚᐅᖅᐳᑦ ᓇᖕᒥᓂᖅ ᐱᓕᒻᒪᒃᓴᕐᓂᕐᒧᑦ ᖁᙱᐊᖅᑕᐅᓂᕐᒧᓪᓗ ᐃᓂᒃᓴᒥᒃ, ᐊᖅᓯᒃᑯᑦ ᐃᓂᒋᔭᖓ, ᐃᑲᔪᖅᑐᖅᑕᐅᑦᑎᐊᖅᖢᑎᒃ ᐃᒡᓗᓕᒃ ᕼᐊᒻᓚᒃᑯᑎᓐᓂᑦ, ᑭᑉᓯᒐᒃ ᓯᐊᕐᕆᔮᕐᕕᖓᓂ. ᐅᑭᐅᑦ 16 ᐊᓂᒍᖅᓯᒪᓕᖅᑐᑦ ᐊᖅᓯᒃᑯᑦ ᐱᓕᕆᔨᖏᑦ ᐊᒃᓱᕈᖅᖢᑎᒃ ᐱᓕᕆᖃᑦᑕᖅᓯᒪᕗᑦ ᐊᐅᓚᑦᑎᔪᒪᓪᓗᑎᒃ ᐱᑎᑦᑎᔪᒪᓪᓗᑎᒡᓗ ᐊᑦᑕᕐᓇᖏᑦᑐᒥᒃ ᐃᓂᒃᓴᒥᒃ ᒪᒃᑯᒃᑐᓄᑦ ᐃᒡᓗᓕᖕᒥ, ᓴᖅᑭᑎᑦᑎᕙᒃᖢᑎᒃ ᐊᒻᒪᓗ ᑕᑯᒃᓴᐅᑎᑦᑎᕙᒃᖢᑎᒃ ᖁᙱᐊᖅᑕᐅᔪᒃᓴᓂᒃ, ᓂᔾᔭᐅᓯᔭᖅᑎᑦᑎᓪᓗᑎᒃ, ᐃᓕᓐᓂᐊᖅᑎᑦᑎᕙᒃᖢᑎᒃ, ᐃᓄᐃᓪᓗ ᖃᐅᔨᒪᔭᑐᖃᖏᓐᓂᒃ ᐃᓕᓐᓂᐊᖅᑎᑦᑎᕙᒃᖢᑎᒃ ᒪᒃᑯᒃᑐᓄᑦ, ᐊᒻᒪᓗ ᐊᕐᕌᒍᓕᒫᒧᑦ ᓴᓇᕝᕕᐅᔭᒃᓴᖅᑖᖅᑎᑦᑎᕙᒃᖢᑎᑦ ᐊᑑᑎᖃᑦᑎᐊᖅᑐᒃᑯᑦ. ᑕᐃᒪᙵᑦ ᐃᓂᒋᔭᕗᑦ ᒪᑐᐃᓚᐅᖅᑎᓪᓗᒍ 2009−ᒥ 150 ᐅᖓᑖᓃᑦᑐᓂᒃ ᖁᙱᐊᖅᑎᑦᑎᔨᒻᒪᕆᖕᓂᒃ ᑎᑭᑦᑐᖃᖅᓯᒪᓕᖅᐳᖅ ᖁᙱᐊᖅᑕᐅᔭᖅᑐᖅᖢᑎᒃ ᓇᑭᙶᕈᓘᔭᖅᑐᓂᒃ ᓄᓇᕐᔪᐊᓕᒫᒥᒃ ᐃᓂᒋᔭᑦᑎᓐᓄᑦ. ᐊᔾᔨᐅᖏᑦᑑᓯᒪᕗᖅ ᖁᙱᐊᖅᑕᐅᕕᒃ ᓄᓇᕗᒻᒥ, ᑲᑎᙵᑎᑦᑎᓪᓗᓂ ᒫᓐᓇᓕᓴᕐᓂᒃ ᓴᓇᙳᐊᖅᑕᐅᕙᒃᑐᓂᒃ ᐊᒻᒪᓗ ᐃᓄᐃᑦ ᐃᓕᖅᑯᓯᑐᖃᖏᓐᓂᒃ. ᑖᓐᓇ ᐃᓂᒋᔭᕗᑦ ᓴᖅᑭᑎᑦᑎᓯᒪᕗᖅ ᐊᒥᓱᓂᒃ ᐊᔪᙱᑦᑐᒻᒪᕆᖕᓂᒃ ᐃᓄᐃᑦ ᓴᓇᓯᐊᖅᑎᓂᒃ, ᓂᔾᔭᐅᓯᔭᖅᑎᓂᒃ, ᐱᙳᐊᖅᑎᓂᒃ, ᖁᙱᐊᖅᑎᑦᑎᔨᐅᔪᓂᒡᓗ ᐊᔪᕈᓐᓃᖅᓴᖅᓯᒪᔪᓂᒃ ᐱᕈᖅᓴᓯᒪᓪᓗᑎᒡᓗ ᑕᒪᑐᒥᖓ ᐱᓕᕆᐊᖑᔪᒥᒃ ᐊᑐᖅᑎᑕᐅᔪᒃᓴᒥᒃ. ᐃᓂᒋᔭᕗᑦ ᐊᔾᔨᖃᙱᓚᖅ ᓄᓇᕘᓕᒫᒥ; ᑖᓐᓇ ᐃᓂᐅᔪᖅ ᑲᔪᙱᖅᓴᐅᔾᔪᑎᐅᕗᖅ ᐊᓯᖏᓐᓄᑦ ᓄᓇᓕᖕᓄᑦ, ᑐᑯᑎᖢᒋᑦ ᐊᔪᕐᓇᙱᓐᓂᖓᓂᒃ ᐃᓂᒃᓴᖅᑕᖃᕆᐊᒃᓴᖅ ᑐᕌᖓᔪᒥᒃ ᓴᓇᙳᐊᖅᑎᐅᕙᒃᑐᓄᑦ ᐃᓄᐃᓪᓗ ᐃᓕᖅᑯᓯᖏᓐᓄᑦ ᓄᓇᕗᒻᒥ.

ᐅᓪᓗᒥ, ᐃᑲᔪᖅᑕᐅᔪᒪᕗᒍᑦ ᐃᓕᔅᓯᓐᓄᑦ. ᑭᓱᓕᒫᑦᑎᐊᑦ ᓴᓇᔭᐅᓯᒪᔪᑦ ᐊᕐᕌᒍ 16−ᓂ ᐊᓂᒍᖅᑐᓂ−ᐱᙳᐊᕈᑏᑦ, ᐊᓐᓄᕌᑦ, ᓂᔾᔭᐅᓯᔭᐅᑏᑦ−ᑭᓱᓕᒫᑦᑎᐊᑦ ᐱᑕᖃᕈᓐᓃᕐᒪᑎᒃ. ᑐᖅᑲᖅᑕᕐᕕᐅᓪᓗᓂ ᓂᔾᔭᐅᓯᔭᖅᑏᑦ ᓇᖕᒥᓂᖅ ᓂᔾᔭᐅᓯᔭᖅᑐᖅᓯᐅᑎᖏᑦ ᐃᓂᒋᔭᑦᑎᓐᓃᓚᐅᖅᐳᑦ ᓄᖑᑕᐅᓚᐅᕆᓪᓗᑎᒃ ᐃᑭᑦᑐᒧᑦ.

ᑮᓇᐅᔭᓂᒃ ᐱᕈᖅᓴᐃᓇᓱᒃᐸᓪᓕᐊᕗᒍᑦ, ᐱᓗᐊᖅᑐᒥ ᑐᐊᕕᕐᓇᖅᑐᓄᑦ ᐃᑲᔪᖅᑕᐅᔾᔪᑎᒃᓴᓄᑦ ᐃᓇᖐᔾᔪᑎᒃᓴᓂᒃ ᓴᓇᙳᐊᖅᑎᐅᑉ ᓇᖕᒥᓂᖅ ᓂᔾᔭᐅᓯᔭᐅᑎᖏᓐᓂᒃ ᐱᖁᑎᖏᓐᓂᒡᓗ, ᓲᕐᓗ ᑯᒃᑭᑦᑕᐹᓂᒃ ᐊᒻᒪᓗ ᓂᐱᓕᐅᖅᓯᒪᔪᓂᒃ. ᑮᓇᐅᔭᒃᑲᓐᓃᑦ ᐊᑐᖅᑕᐅᓂᐊᖅᑐᑦ ᓴᓇᒃᑲᓐᓂᕐᓂᕐᒧᑦ ᑭᓱᓕᒫᓂᒃ ᓴᖅᑭᑕᐅᓚᐅᖅᑐᓂᒃ ᐅᑭᐅᑦ ᖁᓖᑦ ᓇᑉᐸᕐᓗ ᐊᓂᒍᖅᓯᒪᓕᖅᑐᓂᒃ, ᑕᐅᑐᙳᐊᕈᓐᓇᖁᓪᓗᑕ ᐊᔪᕐᓇᖏᓐᓂᖓᒥᒃ ᓴᖅᑭᑦᑎᓪᓗᑕᓗ ᖃᐅᒪᓂᖅᓴᒥᒃ, ᐊᑦᑕᕐᓇᖏᑦᑐᒥᒃ ᐃᓂᒃᓴᒥᒃ ᐃᓕᖅᑯᓯᒧᑦ ᓴᓇᙳᐊᕐᓂᕐᒧᓪᓗ ᓄᓇᓕᑦᑎᓐᓂ.

ᑕᓐᓇ ᓴᓇᔭᐅᒃᑲᓐᓂᕐᓂᖓ ᐊᕐᕌᒍᒐᓴᖕᓄᑦ ᐱᓕᕆᐊᖑᓂᐊᖅᐳᖅ, ᐃᑲᔪᖅᑕᐅᔭᕆᐊᖃᕐᓂᐊᖅᖢᑕᓗ. ᐃᒡᓗᓕᐅᕈᑎᒃᓴᑦ ᐅᒥᐅᕐᔪᐊᒃᑯᑦ ᑭᓯᐅᓂ ᑎᑭᑎᑕᐅᔪᓐᓇᖅᐳᑦ, ᐃᓂᒃᓴᖃᑦᑎᐊᙱᖢᑎᒃ, ᐋᒡᒌᓯᒥ ᐊᕐᕌᒍᖃᒫᑦ, ᐊᒻᒪᓗ ᐅᑭᐅᒃᑯᑦ ᓂᒡᓕᓱᖕᓂᖓ -60 ᐃᒃᑮᖑᓂᕐᒧᐊᓲᖑᖕᒪᑦ, ᑭᖑᕙᕆᐊᕈᑕᐅᒐᔪᒃᐳᖅ ᓴᓇᔭᐅᓇᓱᖕᓂᖓ. ᑕᒪᒃᑯᐊ ᐱᔾᔪᑕᐅᔪᑦ, ᐊᓯᖏᓐᓂᒡᓗ, ᑕᐃᒫᒃ ᐃᒡᓗᓕᐅᕐᓂᖅ ᐅᑭᐅᖅᑕᖅᑐᒥ ᐊᒥᓱᓂ ᐊᕝᕕᐊᕈᑎᖃᖅᐸᒃᐳᖅ ᑐᓗᖅᑕᕈᑕᐅᕙᒃᖢᓂᓗ. ᓂᕆᐅᒃᐳᒍᑦ ᐃᑲᔪᖅᓱᖅᑕᐅᓂᕗᑦ ᐃᓄᖕᓂᒃ ᐱᓕᕆᖃᑎᒋᖃᑦᑕᖅᓯᒪᔭᑦᑎᓐᓂᒃ ᐊᒻᒪᓗ ᐊᒃᑐᐃᖃᑕᐅᓯᒪᔪᓂᒃ ᐊᕐᕌᒍᓂ ᖁᓕᓂᒃ ᐊᓂᒍᖅᑐᓂᒃ, ᑕᒪᓐᓇ ᐱᒋᐊᕈᑕᐅᓂᐊᖅᐳᖅ ᐱᐅᔪᒻᒪᕆᖕᒧᑦ ᐊᖅᑯᑎᒃᓴᒧᑦ ᓯᕗᒻᒧᐊᖅᐸᓪᓕᐊᓂᕐᒧᑦ.

ᖃᓄᑐᐃᓐᓇᑦᑎᐊᖅ ᑮᓇᐅᔭᓂᒃ ᑐᓂᓯᔪᓐᓇᕈᕕᑦ, ᐅᕝᕙᓘᓐᓃᑦ ᐃᓄᖕᓄᑦ ᑐᓂᔪᓐᓇᕈᕕᐅᑦ ᐱᓕᕆᓂᕆᔭᕗᑦ, ᐃᑲᔫᑎᖃᕐᓂᐊᖅᐳᖅ ᓄᓇᓕᖕᓂ ᓴᓇᙳᐊᖅᑎᓂᒃ ᐊᔪᕐᓇᖅᑐᖅᓯᐅᖅᑎᓪᓗᑕ ᐊᒻᒪᓗ ᐱᓕᕆᕙᓪᓕᐊᑎᓪᓗᑕ ᓄᑖᕐᒥᒃ ᐱᐅᔪᒥᒡᓗ ᐃᓂᒃᓴᒥᒃ ᒪᒃᑯᒃᑐᓄᑦ, ᓴᓇᙳᐊᖅᑎᐅᕙᒃᑐᓄᑦ, ᐊᒻᒪᓗ ᐃᓄᐃᑦ ᐃᓕᖅᑯᓯᖏᓐᓄᑦ ᐃᒡᓗᓕᖕᒥ ᓄᓇᕗᒻᒥᓗ. ᖁᔭᓐᓇᒦᒃ, ᐊᒻᒪᓗ ᓇᒡᓕᒍᓱᖕᓂᖃᖅᑐᓕᒫᑦ ᖁᔭᒋᕙᕗᑦ ᑕᒪᑐᒪᓂ ᐊᔪᕐᓇᖅᑐᖅᓯᐅᖅᑎᓪᓗᑕ.